Wala sang tupong ang kasubo sang pamilya kun mapatay ang ila himata — ilabi na kun ini biktima lang sang sirkumstansya kaangay sang plug nga nasal-an lang kag ginbutong sang ospital.
Sa Vancouver, Washington, USA, isa ka ospital ang ginkasuhan sang negligence kag pagtuga sang severe emotional distress bangud sa pagkakas sa plug sa sala nga pasyente nga nagakinahanglan sang life support.
Nag-ugat ini nga kaso sang ginpamangkot sang PeaceHealth Southwest Medical Center ang pamilya sang ‘brain dead’ patient nga si Michael Beehler kun padayunon pa nila ang life support.
Bisan mabudlay ang amo nga desisyon, nagsabat ang utod ni Michael nga si Debbie Danielson nga mapasugot sila nga butungon na lamang ang plug.
Ginhaya ang bangkay ni Michael, ginbutang pa ang iya pangalan sa obituary section sa newspaper, kag madamo ang nagpakig-unong sa pamilya.
Napuno sang kasubo ang mga himata kag abyan, apang nabayluhan ini sang tuman nga kakibot bangud pagkasunod nga adlaw, nakabaton sang tawag ang utod nga si Debbie halin mismo kay Michael.
Indi makapati si Debbie nga buhi ang iya utod bangud ginhaya pa gani nila ini, gani nga nag-report sila gilayon sa otoridad.
Gin-retrieve sang Clark County Medical Examiner ang bangkay, kag sang gin-usisa paagi sa fingerprint examination, didto nakumpirma nga indi ini si Michael kundi isa ka lalaki nga nagahingalan kay David Wells.
Natukiban nga si Wells, 69, ang bag-o lang gid nag-abot sa ospital sang amo nga tion bangud nadunlan ini sang ginkaon nga steak kag nangin unconscious kag nag-untat man sa pagginhawa.
Bangud roommate sila ni Michael, nasal-an nga siya ang ‘brain dead’ patient kag siya ang ginkakasan sang life support bisan nga wala man sang pahanugot halin sa iya nga pamilya.
Suno sa bata ni Wells nga si Shawn, napahibalo man siya sang ospital nga may medical emergency nga ginkamatay sang iya amay, apang wala gid siya sang hinalung-ong nga may natabo gali nga sala sa pag-identify sa pasyente. Nabalahuba lamang ang kamatuoran sang nabalita ini kag ginpangayuan siya sang komento sang telebisyon duha ka tuig ang nagligad.
Nakit-an sang Washington Department of Health nga sampaw-sampaw ang violations sang hospital lakip na ang kapalpakan sa proseso sa pag-identify sa pasyente kag pag-train sa ila nga staff para sa identification.
“The PeaceHealth Southwest Emergency Department is one of the busiest on the West Coast, treating 80,000 patients a year. Our highly skilled healthcare team is committed to providing quality care in a safe environment every day,” kabahin naman sang nangin statement sang ospital. “Given that PeaceHealth is involved in litigation, it is unfortunate we are unable to share more facts about this situation. Our unwavering commitment of caring for our community remains stronger than ever.”
Magluwas sa ospital, ginkasuhan man ang American Medical Response Ambulance kag ang All County Cremation and Burial bangud sa negligence kag severe emotional distress nga natuga sa pamilya sang napatay.
