Nagapati ang anay legal adviser ni former President Rodrigo Duterte nga wala sang basehan ang human rights groups kag pamilya sang mga gina-alegar biktima sang extrajudicial killings sa ila pagpasaka sang kaso nga disbarment.
Gindepensahan ni Attorney Salvador Panelo si Duterte, nga nagasiling nga ang kontrobersyal nga mga hambal sang anay presidente sa tion sang mga pagbista sa Senado sa war on drugs ang “hyperbolic” kag indi magpadayon sa korte.
Ang kaso ginpasaka sang Biernes sang Human Rights Group nga Karapatan, kaupod ang mga religious leaders kag advocates.
Gintumod nila ang testimonya ni Duterte sa Senado, sa diin gin-ako sini ang pagpaguwa sang “kill orders” bilang kabahin sang kampanya sang iya administrasyon batuk sa iligal nga droga.
Ang mga petitioners nagasiling nga ang mga aksyon ni Duterte naglapas sa Code of Professional Responsibility and Accountability (CPRA) kag nagpakita sang pagginawi nga indi nagakabagay sa isa ka abogado.
Ginpamatukan ni Panelo ang mga alegasyon, nga nagasiling, “Wala siya sang nahimo nga indi maayo nga buhat ukon naglapas sang bisan ano nga kasuguan bilang katapo sang Bar.”
Dugang pa niya nga gin-insister nga wala sang pag-ako sang mga pagpamatay nga wala sa korte kag ang mga pahayag sang mga human rights advocates ang ginpasobrahan kag indi ini pag-usisaon sa korte.
