Ipatuman na epektibo subong nga adlaw, Enero 20, ang maximum suggested retail price (MSRP) nga P58 sa imported rice.
Suno sa Department of Agriculture (DA), sa Metro Manila anay ang inisyal nga implementasyon kag panilagan sa masunod nga sinemana para sa posible nga adjustments.
Suno kay Agriculture Assistant Secretary kag spokesman Arnel de Mesa, maga-check ang personnel sang DA kag Department of Trade and Industry (DTI) sa mga merkado agud masiguro nga naga-comply sila sa pagsulundan.
Sa idalom sang Price Act, mahimo makapatong ang traders sang maximum nga 10% nga ginansya sa baligya nila, apang sa idalom sang maximum SRP, ang P58 amo dapat ang pinakamataas nga presyo.
May pila ka rice varieties kaangay sang glutinous rice, black rice kag red rice nga indi covered sang maximum SRP.
Ginpahayag ni De Mesa nga kumpyansa sila nga maganubo na ang retail price sang bugas sa masunod nga inadlaw.
Samtang, subong man nga semana natalana nga mag-istorya si DA Secretary Francisco Tiu Laurel Jr. kay President Ferdinand Marcos, Jr. para sa pormal nga implementasyon sang food security emergency nga ginalauman nga pirmahan sa Myerkules.
