Padayon nga tinguhaan sang Gilas Pilipinas nga maka-adjust nga wala ang presensya ni Kai Sotto ilabi na samtang nagapreparar para sa 2025 FIBA Asia Cup sa Jeddah, Saudi Arabia sa Agusto.
Ginpahayag ini ni Coach Tim Cone matapos nalutos sa duha ka sunod-sunod nga hampang sa third and final window sang qualifiers, apang kuwalipikado man gihapon sa tournament proper.
Kahapon, sa rematch batok sa New Zealand, gintambakan sang Tall Blacks ang Gilas, 87-70.
Suno kay Cone, nadulaan sila sang isa ka key player sang nakaangkon sang injury si Sotto, kag isa ini sa mga bagay nga ila padalman samtang nga nagahinampot ang Asia Cup.
“We lost obviously a key, key player for a year in terms of Kai Sotto,” suno sa coach. “We’re still trying to adjust how to play without him… That is [one of] the things we’re going to be talking about and thinking about as we go into the FIBA Asia Cup.”
Nahibaluan nga sa lima ka hampang, apat ka beses nga nalutos ang Gilas halin sang wala nakaupod sa ila ang 7-foot-3 star.
Naangkon sini ang knee injury sa Japan B. League sang Enero, nagpaidalom sa operasyon kag ginalauman nga magapahuway sa sulod sang anum ka bulan para sa full recovery.
Nalakip sa kalutusan sang Gilas amo ang duha ka friendly games sa Doha International Cup sa Qatar kag ang duha ka magkasunod nga hampang batok sa Taiwan kag New Zealand sa final window sang Asia Cup qualifiers nga amo ang naghigko sa ila 4-0 run.
Gin-ako man ni Cone nga sa baylo nga mabuligan sila sang ila friendly games sa Qatar antes ang qualifiers, wala ini nagpabor sa players.
“These windows are so short. We’re together so little. We were able to do a Doha trip before we came here just to try to get more time together and play more games,” suno kay Cone. “It probably hurt us more than it helped us in terms of being ready for Taiwan and New Zealand.”
“But we’re trying to look at it at a bigger picture in terms of the FIBA Asia coming up, because we know we’re not going to have much time, maybe eight, 10 days at most to come together and prepare for that tournament.”
Ang iban pa nga mga kuwalikado nga teams sa Asia Cup amo ang Australia, Korea, New Zealand, China, Japan, Jordan, Saudi Arabia, Iran, Qatar, kag Lebanon.
