Ginpatawag sang mga pulis sa South Korea ang isa ka babaye nga naghalok kay Jin nga miyembro sang K-pop supergroup nga BTS.
Suno sa Songpa police station sa Seoul, gin-request nila ang babaye nga magpalapit para nga pamangkuton kaangot sa alegasyon sang sexual harassment.
Wala na ginpaguwa sang police station ang identity sang babaye bangud sa privacy, apang may mga impormasyon halin sa media reports nga naga-edad ini sang 50-anyos kag halin pa sa Japan, apang nagapamalibad nga magkadto sa Korean police.
Ginlunsar sang pulis ang imbestigasyon matapos nakabaton sang online complaint.
Matandaan nga isa ka adlaw matapos natapos ni Jin ang iya mandatory 18-month military service sadtong Hunyo 2024, ginselebrar sini ang iya discharge kag ang 11 year anniversary sang band paagi sa pag-offer sang free hugs sa iya fans sa isa ka event sa Seoul.
Sa amo nga event nga ginreport nga gintambungan sang 1,000 ka mga tawo, may isa ka babaye nga naghalok kay Jin bisan nga wala sang pahanugot.
Ginsulat pa sang babaye sa iya online blog ang amo nga eksperyensya. “My lips touched his neck. His skin was so soft,” suno sa gin-quote sang Yonhap news agency.
Na-establisar ang BTS sang 2013 kag may yara sang global supporters nga ginatawag nga “Army.”
Si Jin, 32, amo ang oldest member sang amo nga supergroup kag una nga nakatapos sa military duty.
Ang isa ka pa miyembro nga si J-Hope ang natapos naman sa serbisyo sang Oktubre, samtang ang nabilin naman nga members nga sanday V, RM, Jimin, Jungkook, kag Suga ang yara pa gihapon sa military service.
