Kinaandan kun may yara kita sang flight, indi gid kita mahim-os kun isa ka oras na lang ang nabilin kag wala pa kita sa airport.
Ang iban gani, hapon pa ang schedule pero aga pa nagakadto sa paluparan.
Sa amo sini nga sitwasyon, may ginasunod nga airline policies para sa pag-rebook ukon maghimo sang alternative travel arrangements. May airlines nga nagahatag sang brief grace period ukon “flat-tire rule”, apang kun wala sang polisa, may airlines naman nga nagamarka sang ticket nga no-show nga maga- cancel sang connecting ukon return flights.
Sa isa ka hitabo sa Chile, naatrasar gid ang isa ka flight sang na-late sang abot ang isa ka pasahero kag sa sobra sini ka desperado nga indi siya mabayaan, ginbanggaan sini ang eroplano.
Nagpatunga gid ang lalaki sa alagyan sang eroplano rason nga indi makahalin ang aircraft bisan nga ginmaniobra na sang pilots kag ready na gid kuntani sa flight.
Ginkadtuan sang staff sang airport ang lalaki kaupod ang security patrol, ginpaguwa sa runway, kag gintugyan sa pulisya.
Ang imbes gamay lang kuntani sini nga late, labi pa gid nga naglawig bangud sa proseso bangud kasuhan pa ini.
Base sa reports, pakadto kuntani ang 29-anyos nga pasahero sa Concepcion, Chile sakay sang Latam Airlines, apang bangud na-late siya, naglusot siya sa security, nagdalagan sa runway, kag nagtindog didto sang isa ka minuto.
10 minutes man ang delay sang flight nga sang ulihi naglupad gid nga wala ang amo nga pasahero.
