Nagtaliwan na sa edad nga 98-anyos ang amay ni Angel Locsin nga si Angel M. Colmenares.
Ginkumpirma ini sang iya pamilya kadungan sang pag-request sang privacy sa tion sang ila nga kalisod. Nagpasalamat man ang pamilya sa mga nagpadala sang mensahe sang pagpalangga kag simpatiya subong nga mabudlay nga tinion.
“My Deepest Sympathy and Condolences to the Family of Angel Locsin. May You Find Eternal Peace and Happiness. Rest in Peace Lolo Budi,” kabahin sang pagkumpirma ni Bago City, Negros Occidental Councilor Joseph Colmenares nga paryente sang natungdan.
Kabahin anay si Colmenares sang Philippine team nga nagdaog sang bronze medal sa 4×200-meter freestyle relay sa 1954 Asian Games nga ginpatigayon diri sa Pilipinas.
Ini nga swimming skills ang ginpasa man niya sa anak nga aktres tubtub nga nag-compete man ini sa national kag international age-group meet sa bata pa nga edad.
