Handa ang Philippine National Police (PNP) nga maghatag sang bulig sa International Criminal Police Organization (Interpol) kun may iban pa nga warrant of arrest nga iga-isyu batok sa mga “co-perpetrators” ni anay presidente Rodrigo Duterte sa iya makamamatay nga war on drugs.
Ginbuyagyag ni PNP spokesperson Police Brigadier General Jean Fajardo nga wala pa sang impormasyon nga nahatag sa ila angot sa amo nga bagay, apang nagpasalig nga may yara sang “template” ang PNP sa pagserbe sang posible arrest warrants sa iban pa nga mga indibidwal nga may kaangtanan sa drug war.
Ginserbe sang mga otoridad sang nagligad nga Martes ang warrant of arrest halin sa International Criminal Court (ICC) batok kay former President Rodrigo Duterte bangud sa panumbungon nga murder bilang isa ka krimen batok sa katawhan may kaangtanan sa iya makamamatay nga drug war nga ginapahayag nagresulta sa kamatayon sang indi magnubo sa 6,000 ka tawo.
Ang anay presidente sang Pilipinas ang yara subong sa detention cell sang ICC sa The Hague, Netherlands. Naghimo siya sang iya una nga pag-atubang sa ICC sang Biyernes, paagi sa video link.
Una na nga ginpahayag sang Malacañang nga wala ini sang may nabaton nga opisyal nga komunikasyon nahanungod sa anuman nga pahibalo sang Interpol para sa mga “co-perpetrators” ni Duterte may kaangtanan sa maduguon nga giyera sa droga sang iya administrasyon.
