ILOILO – Wala na sang plano nga magpasaka sang kaso ang pamilya sang pahinante nga napatay matapos makabunggo ang iya ginasakyan nga delivery sa naga-park nga dump truck sa Brgy. Pili, Ajuy, Iloilo.
AIng biktima amo si June Selubrico, residente sang Brgy. Monpoc, Barotac Nuevo, Iloilo.
Samtang, ang isa pa gid ka sakay amo si Ronilo Juliado Muyong, 34, kasado, kag residente sang Brgy. Trapiche, Oton, Iloilo.
Ang driver naman amo si Jason Puga Patanao, 24, kag residente sang Brgy. Tolarucan, Mina, Iloilo.
Sa interview sang Bombo Radyo Iloilo kay Police Captain John Michael Dalipe, Hepe sang Ajuy Municipal Police Station, iya ginpahayag nga ginahulat nalang sang tag-iya sang delivery van ang tag-iya sang dump truck nga magpauli sa banwa sang Ajuy agud nga ma-settle ang natabo nga insidente.
Dugang pa ni Dalipe, ginsabat na sang tag-iya sang delivery van ang pagpalubong kay Selubrico kag ang pagpabulong sa ospital sang driver kag sang isa pagid ka pahinante.
Sa subong, padayon pa ang imbestigasyon sang mga kapulisan sa insidente.
-With a report from Bombo Hanna Andasa
