Wala subong nakahibalo ang National Police Commission (Napolcom) kun sa diin na ang pulis nga nagpamahog sa International Criminal Court (ICC) kag sa Interpol kaangot sa pagkaaresto kay former President Rodrigo Duterte sang Marso 11.
Ini amo si Patrolman Francis Steve Fontillas nga kilala man bilang si Fonts Stv Vlogs sa iya Facebook account.
Temprano nga bahin sang Marso sang nagpaguwa siya sang threat sa Interpol kag sa international tribunal paagi sa pagsiling nga may gyera nga matabo kun tandugon ang former president nga iya ginatawag nga “Tatay Digong.”
Suno kay Napolcom Commissioner Ralph Calinisan, at large subong ang amo nga patrolman, wala sa Quezon City Police District (QCPD), kag padayon pa nga ginapangita.
Ginbuyagyag man sang Napolcom nga sang Pebrero, nag-request ang superior sang pulis nga magpaidalom ini sa mental health check sa regional office, apang wala ini nagsipot kag nagpamalibad nga magpa-test sa medical team sang Philippine National Police (PNP).
Nag-file naman ang Napolcom sang panumbungon nga grave misconduct kag conduct unbecoming of a police officer batok kay Fontillas kasunod sang ila ginpatigayon nga kaugalingon nga imbestigasyon.
Magluwas sa administrative cases halin sa Napolcom, una naman nag-file ang PNP sang “inciting to sedition” criminal case batok sa patrolman sa Quezon City Prosecutor’s Office.
Posible suno kay Calinisan nga madagdagan sang penalidad si Fontillas kaangay sang suspension, iga-demote (bisan nga patrolman na ini ukon ang lowest ranking nga police officer) ukon kakasan gid sang badge ukon pahalinon sa serbisyo.
Sa latest post ni Fontillas, ginsuyaan pa sini ang PNP kag nagsiling nga indi siya magsunod sa mga order sang organisasyon.
