Nadepensahan sang Pinoy boxer nga si Melvin Jerusalem ang World Boxing Council (WBC) minimumweight crown matapos ginlutos paagi sa unanimous decision ang Japanese fighter nga si Yudai Shigeoka.
Sa rematch sa Aichi Sky Dome sa Japan, ginpamatud-an ni Jerusalem nga sa iya dapat magkadto ang 105-pound crown matapos nakuha ang scores nga 118-110, 119-109 kag 116-112.
Antes ang hampang, knockout kuntani ang tuyo sang Pinoy, apang kuntento na ini kun mahatag sa iya ang daku nga antad sa kadalag-an ipaanggid sa split decision win nga iya naangkon batok sa Japanese southpaw sang nagligad nga tuig.
Si Jerusalem nga tumandok sang Manolo Fortich, Bukidnon ang nagsaka na subong sa 24-3 record nga may 12 knockouts, samtang nag-us-os naman si Shigeoka sa 9-2 nga may 5 knockouts.
Una na nga nagpasalig ang promoter nga may mas daku nga away si Jerusalem subong nga tuig kun malutos sini liwat si Shigeoka. Ginalantaw ang unification sa World Boxing Organization kag World Boxing Association champion nga si Oscar Collazo nga amo ang naglutos kay Jerusalem bilang WBO minimumweight champion sang 2023.
