Ginalantaw sang tiglikom sang Department of Trade and Industry (DTI) nga sa tunga-tunga sang bulan sang Mayo matabo ang trade negotiations sa Estados Unidos sang Amerika kasunod sang polisa ni Trump sa taripa.
Suno kay Trade Secretary Cristina Roque, siya kag si Special Assistant to the President for Investment and Economic Affairs Secretary Frederick Go ang posible nga mag-byahe padulong sa Washington DC para sa amo nga diskusyon.
Pahayag ni Roque, igaplastar nila ang suod nga relasyon sang Pilipinas kag Estados Unidos kag ang maragtas sang duha ka nasyon kun negosyo ang pagahambalan.
Ginsiling man sang opisyal nga ipakigbahin man nila sa US nga madamo na ang naga-invest subong sa Pilipinas ilabi na bangud madamo sang insentibo nga ginatanyag. Paagi sini suno kay Roque, mahimo man mahatag sang Pilipinas ang pinakamaayo nga mga produkto sa pinakamaaayo man nga presyo.
Dugang sang trade secretary, luyag man sang mga pungsod sa Southeast Asia nga mag-negosyar sa US bilang isa ka bloc, apang ini nga tikang suno sa iya ang nakadepende sa tagsa ka pungsod subong.
Una na nga ginpaathag sang DTI kag Department of Agriculture (DA) nga yara sa maayo nga posisyon ang Pilipinas ipaanggid sa iban nga pungsod sa ASEAN kun taripa sang US ang pagahambalan. Ini bangud 17% ang ginpatuman ni US President Donald Trump sa Philippine exports nga mas manubo ipaanggid sa iban nga kaiping nga nasyon nga naga-export man sang ila mga produkto.
Lakip sa ginhalimbawa sang trade official nga makabenepisyo sa tariff rate sang US amo ang agricultural products kaangay sang coconut oil kag dried mangoes.#
