Ginmanduan sang Department of the Interior and Local Government (DILG) ang Philippine National Police (PNP), Bureau of Fire Protection (BFP) kag ang local government units (LGUs) nga istrikto nga i-implementar ang nagakaigo nga mga tikang para sa public safety subong nga gina-obserbar ang Semana Santa.
Sa idalom sang isa ka memorandum circular, may mandu ang ahensya sa tanan nga local chief executives (LCEs) nga tipunon ang ila nga local peace and order councils, kag iban pa nga local teams para epektibo nga mapatuman ang contingency plans sa sini nga balaan nga semana.
Kasunod ini sang nangin mandu man ni President Ferdinand R. Marcos Jr. nga pasulabihon gid ang safety sang mga tawo subong nga Holy Week. Lakip na diri suno sa DILG ang bastante nga transportasyon kag emergency medical services.
Dapat man nga mag-deploy ang mga local government units sang law and traffic enforcers, medical personnel, kag iban pa nga force multipliers sa critical areas kaangay sang local and national roads, crime-prone areas ukon hotspots, transportation terminals, simbahan kag iban pa nga public places.
Sa pihak nga bahin, ang Office of Civil Defense (OCD) ong nagpahayag man nga naka-heightened alert na ang tanan sini nga regional offices.
Ginpasaka man ang alert levels sang Regional Disaster Risk Reduction Management Councils kag National Disaster Risk Reduction and Management Operations Center (NDRRMOC) agud nga maka-responde gilayon kun may mga emerhensya.
Naka-blue alert ang kadam-an sang mga opisina nga buot silingon mas ginpataas ang pagpanghanda sa potential slow-onset hazards ukon indi kinaandan nga mga sitwasyon nga nagakinahanglan sang bulig sang mga personnel.
Sa Western Visayas kag Bicol, mas mataas ang lebel nga amo ang red alert bangud sa pamahog sang Bulkan Mayon kag Bulkan Kanlaon amo man ang epekto sang tyempo sini nga Lenten season. Ang pula amo ang pinakamataas nga alert level status agud ma-address ang emerhensya kag gina-require gid ang immediate staffing kag interagency coordination.
