Nagpanawagan si Pope Francis sa mga tumuluo nga ipangamuyo man nga mangin malipayon ang mga kaparian.
Kabahin ini sang homily sang Santo Papa nga ginpreparar para sa Chrism Mass sa St. Peter’s Basilica sa Vatican kadungan sang Huwebes Santo. Ginbasa ini ni Cardinal Domenico Calcagno, President Emeritus sang Administration of the Patrimony of the Apostolic See.
“If only we let Him teach us, our ministry,” kabahin sang homiliya, “becomes one of hope, because in each of our stories God opens a jubilee: a time and an oasis of grace.”
Bangud wala pa dalayon nga naka-recover ang Pope kasunod sang masobra isa ka bulan nga pagtinir sa ospital sa Roma, may ginpang-assign lang ini nga Cardinals para sa liturhiya sa Byernes Santo.
Si Cardinal Claudio Gugerotti, prefect sang Dicastery for the Eastern Churches, ang magapanguna sa Passion service sa Vatican Basilica samtang ang vicar general of Rome nga si Cardinal Baldassare Reina ang maga-preside sa Stations of the Cross sa Colosseum apang ang Santo Papa ang nagsulat sang meditations.
Wala pa ginsapubliko sang Holy See kun sin-o ang magapanguna sa Easter Vigil Mass sa Sabado sang gab-i kag sa Easter Sunday Mass.
Nahibaluan nga bisan nakaguwa na sa ospital ang 88-anyos nga Santo Papa, gin-abisuhan ini sang mga doctor nga magpahuway anay kag maglikaw sa dalagku nga mga pagtilipon.
