Natalana nga magapili sang petsa ang mga Cardinals para sa conclave ukon pagtililipon sang College of Cardinals agud magpili sang bag-o nga Papa kasunod sang pagtaliwan ni Pope Francis.
Sa karon may yara sang 135 ka mga cardinal electors gikan sa nagkalain-lain nga pungsod sa Vatican humalin sang napatay si Pope Francis sang Abril 21.
Ang mga Cardinals naghiwat man sang mga pangkabilugan nga pagsinapol halin sang pagtaliwan sang Argentinian pontiff agud maghimo sang mga desisyon nahanungod sa lubong sang nagtaliwan nga pontiff sang nagligad nga semana kag iban pa nga mga butang.
Mga alas 9:00 sang aga, subong nga adlaw, Lunes, Abril 28, oras sang Roma, ukon alas 3:00 sang hapon, oras sang Pilipinas, ginhiwat sang College of Cardinals ang ila ikalima nga sinapol sa diin ginalauman nga magapili sila sang petsa para sa conclave.
Base sa pagbulubanta sang mga eksperto, ang papal conclave posible nga hiwaton sa Mayo 5 ukon 6, pagkatapos sang siyam ka adlaw nga pagpangasubo sa pagtaliwan ni Pope Francis nga magatapos sa Mayo 4.
