Duha ka beses gid nga nagkinahanglan sang rescue ang isa ka lalaki nga nagsaka sa Mt. Fuji sa Japan matapos sini ginbalikan ang iya nabilin nga cellphone.
Ini amo ang 27-anyos nga estudyante halin sa China nga temporaryo nga nagatinir sa Japan.
Sang Martes, samtang yara na siya sa trail, indi na ini makapanaog bangud nadula sini ang iya crampons nga amo ang spiked device nga ginabutang sa climbing shoes para mas maayo ang ila paglakat.
Gintawgan pa ini sang helicopter agud nga makahalin lang siya sa amo kataas nga area.
Apang pagkasunod nga adlaw, nareyalisar niya nga nabilin gali ang iya cellphone. Bangud tuman ini ka importante para sa iya, ginbalikan gid sini ang iya phone bisan pa nga wala na ginapanugyan ang pag-hike didto sa area.
Sang didto siya sa ibabaw, naglain ang iya pamatyag bangud sa kataason, kag bangud sini, duha ka beses gid siya nga gin-rescue sang otoridad sa sulod lamang sang apat ka adlaw.
May mga nagamuno sa lalaki kun ngaa wala sini ginasunod ang protocol, kag nagpanawagan man ang mga tawo sa iya nga magbayad bangud sa duha ka rescue missions nga ginhimo bangud lang sa iya pagpasaway.
Nahibaluan nga kun indi gani official climbing season sa Mt Fuji, ginasirado ang tanan nga trails pakadto sa summit kag ginapanawagan man ang mga tawo nga indi anay mag-hike.
Sang 2023, masobra 220,000 ka mga tawo ang nagsaka sa popular nga Mount Fuji sa tunga-tunga sang Hulyo kag Septyembre.#
