Nasubuan apang ginlauman na ni anay presidential spokesperson Atty. Harry Roque ang pagpasaka sang Department of Justice sang qualified human trafficking charges batok sa iya.
Gin-file sang Department of Justice (DOJ) ang non-bailable nga kaso sa Angeles City Regional Trial Court (RTC) sa Pampanga kasunod sang ginaalegar nga involvement ni Roque sa gin-raid nga Philippine Offshore Gaming Operators (POGO) hub sa Porac sa amo man nga probinsya.
Sa video nga gin-release ni Roque, ginsiling niya kabahin ini sang pagpabudlay sang gobyerno sa mga kaalyado ni anay Presidente Rodrigo Duterte.
Suno kay Roque, nag-ugat ang pagpang-ipit sa iya bangud siya ang ginapasibangdan sang gobyerno nga responsable sa pagpagwa sang polvoron video kun sa diin makit-an ang isa ka lalaki nga pareho ang itsura kay Presidente Ferdinand Marcos nga sang ulihi, ginkumpirma sang Philippine National Police kag independent fact-checkers nga AI-generated ini kag gin-alter lamang.
Pahayag sang anay spokesperson, sa pihak sang ginapang-ubra sang gobyerno sa iya, nalipay ini bangud nabuyagyag ang isa ka kamatuoran nga dapat sabton ni Marcos kun bangag gid man ini.
Matandaan nga sa qualified human trafficking charges nga ginpasaka sang DOJ,lakip man sa inkasuhan amo si Cassandra Ong kag 48 ka iban pa nga ginaalegar tag-iya, opisyal, kag nagapanguna nga mga empleyado sang Whirlwind mother company kag Lucky South 99 POGO (Philippine Offshore Gaming Operator).
Gin-akusaran sila nga nagapadalagan sang scam farm nga nagapang-traffic sang mga trabahador.
