Inspired sa sporting hero kag Olympic swimmer nga si Teofilo Yldefonso ang logo sang 65th Palarong Pambansa.
Base sa gin-release nga logo features, makit-an ang pixelated human figure nga amo ang iconic nga swimming posture ni Yldefonso nga tumandok sang host province nga Ilocos Norte.
Kilala si Yldefonso nga “Ilocano Shark” kag naga-uyat sang rekord bilang una nga Pinoy kag Southeast Asian nga nakadaog sang Olympic medal sang nakuha sini ang bronze medal sa 200-meter breaststroke sa 1928 Amsterdam kag sa 1932 Los Angeles Olympic Games.
Yara man sa desinyo sang logo ang intricate inabel textile tradition sang rehiyon nga may pixel patterns nga nagarepresentar sang warps kag wefts sang traditional weaving.
Ang mga letra nga “I” kag “N” sa logo ang nagapasundayag sang sinan-bola (ball-like) pattern — isa ka signature motif halin sa inabel designs sang National Living Treasure awardee nga si Magdalena Gamayo.
Maga-umpisa ang Palarong Pambansa sa Mayo 24 kag magalawig tubtub sa Hunyo 2.
Ginalauman nga 15,000 ka mga atleta, mga coach, kag DepEd officials halin sa nagkalain-lain nga rehiyon ang magapasakop sa sini nga pinakadaku nga grassroots sporting event para sa student-athletes sa pagpanguna sang Department of Education.
