Nagsugod na subong nga adlaw, Nobyembre 9, ang pagpanagtag sang mga Apple MacBook Neo kag laptops para sa mga public school teachers sa Dagupan City.
Ang nasambit nga mga laptops yara sa kabug-usan nga 231,725 units, nalakip na diri ang 172,000 units nga Apple MacBook Neo.
Nahibaluan nga yara si President Ferdinand “Bongbong” Marcos Jr., First Lady Liza Araneta-Marcos, kag Education Secretary Sonny Angara sa ceremonial turnover nga ginhiwat sa Dagupan City National High School.
Sa idalom sang DepEd Computerization Program, 10 ka eskwelahan sa Dagupan City ang nakabaton sang 209 ka Apple MacBook Neo laptops.
Suno pa sa DepEd, yara na sa 231,725 ka laptops ang napanagtag kun sa diin 169,008 ang MacBook Neo units kag 62,717 naman ang Windows- based laptops.
May yara naman sang dugang nga 3,646 ka MacBook Neo devices para sa administrative officers.
Dugang pa, nabakal ang tagsa ka MacBook Neo sa balor nga P43,000 kun sa diin P6,900 ang ginbarato sini sa baylo sang orihinal nga presyo sa Pilipinas para sa base model sini.
Ginpaambit man sang DepEd nga may yara ini sang 5-year warranty sa baylo nga 1-year warranty lang.
Suno naman sa speech ni DepEd Sec. Angara, pamaagi sa pagpanghatag sang nasambit nga mga laptop, mas mabuhinan ang workload sang mga manunudlo kun maayo man ang kalidad sang gadgets nga ila ginagamit para sa paghimo sang lesson plan kag reports.
“Sa ilalim ng administrasyon ni Pangulong Bongbong Marcos, gusto nating ibigay sa ating mga guro ang pinakamahusay na tools at tamang training para mapadali ang paggawa nila ng lesson plans o reports at mas makapag-focus sila sa pagtuturo,” suno kay Angara.
