Gindeklarar sang Malacañang ang Hunyo 6, 2025 bilang isa ka regular holiday sa Pilipinas bilang obserbasyon sang Eid’l Adha ukon ang Islamic Feast of Sacrifice.
Ginpirmahan ni President Ferdinand Marcos, Jr. ang Proclamation No. 911 kahapon, Mayo 21, agud nga ma-implementar ini sa bilog nga pungsod.
Ang proklamasyon ang kasunod sang rekomendasyon nagikan sa National Commission on Muslim Filipinos.
Ang Eid’l Adha amo ang isa sa duha sa pinaka-importante nga holidays sa Muslim calendar. Ang isa pa amo ang Eid’l Fitr nga amo ang nagamarka sang pagtakop sang holy fasting month sang Ramadan.
Sa kada Eid’l Adha, nagaihaw ang mga Muslim sang karnero, kanding, baka, ukon camel agud nga dumdumon kun ano ka handa si Prophet Ibrahim nga i-sakripisyo ang iya anak sunod sa sugo ni Allah.#
AFP / Merlyn Manos
