Nag-abot na sa India ang mga eksperto nagikan sa multinational corporation nga Boeing kag GE Aerospace agud nga magbulig sa imbestigasyon sang gobyerno sang India kasunod sang plane crash nga nagpatay sang masobra 200 ka mga tawo.
Magluwas sa ila, yara man ang team of experts nagikan sa United Kingdom kag United States of America agud nga magsuporta sa pagpangusisa sang Aircraft Accident Investigation Bureau sang India.
Nagdesisyon man ang Boeing nga mag-focus sa pagpangusisa kag sa mga customer kag kanselahon anay ang partisipasyon sa Paris airshow nga kinaandan nga isa ka important shop window para sa aircraft manufacturers.
Suno kay Bombo Peach Kamath, international correspondent sa Ahmedabad, India, may mga espekulasyon subong nagikan sa aviation group nga may natabo nga bird strike rason sang engine failure, apang nagaguwa man ang isyu sang pilot error kag maintenance.
Kaangot diri, nagmandu naman ang aviation regulator sa Air India nga magpatigayon sang dugang nga maintenance and safety inspections sa 33 ka nabilin nga Boeing 787 fleet.
Matandaan nga 242 ang sakay sang aircraft sang natabo ang trahedya ginutlo lamang matapos nag-take off sa airport. Isa lamang ang nakaluwas nga amo ang British national nga yara sa Seat 11A.
Sandig sa Air India, sakay sa aircraft ang 169 Indian nationals, 53 Britons, pito ka Portuguese nationals kag isa ka Canadian.#
