Ginbulgar sang opisyal sang Barangay Ingay, Tubungan, Iloilo nga may record man sang pagpangawat ang lalaki nga suspek sa pagpatay sa 18-anyos nga dalaga.
Sa interview sang Bombo Radyo kay Punong Barangay Leonardo Tamesis, iya ginpahayag nga ginreklamo anay ang 33-anyos nga si Aljohn Jalbuna nga amo ang nagkawat kag nagbaligya sang baka nga ginapanag-iyahan man sang Lola sang dalaga nga iya ginpatay.
Suno kay Tamesis, P33,000 ang baligya ni Jalbuna sang baka, kag sang nag-atubangay sila sa barangay, ginpabalik sa iya ang kuwarta kag ginpalab-ot pa sa P50,000 ang sukot sa iya bangud sa ginhimo nga sala.
Magluwas diri, ginatudlo man si Jalbuna nga nagsulod sang balay sa amo man nga barangay kun sa diin may isa ka menor de edad sang 2024.
Sang amo nga tion, wala sang kaso nga napasaka batok sa iya apang ginpaidalom gid sa rehabilitation ang bata sa idalom sang Department of Social Welfare and Development (DSWD).
Nahibaluan nga ini nga mga record sa barangay ang isa sa ginsundan sang Tubungan Municipal Police Station kun ngaa ginkabig si Jalbuna nga isa sa persons of interest. Sang ginkadtuan siya sa iya balay agud dakpon, nag-ako ini sa krimen nga pagpatay, apang hugot nga nagpanginwala nga ginhimuslan niya ang dalaga.
Nag-ako man ang suspek sa paggamit sang iligal nga droga halin pa sang bulan sang Mayo.
Natalana nga ipasaka ang kaso nga Rape with Homicide buwas, Hunyo 23.#
