Naghatag sang positibo nga reaksyon si Congresswoman Julienne “Jamjam” Baronda sang Lone District sang Iloilo City sa ginpresentar nga State of the Nation Address (SONA) ni President Ferdinand “Bongbong” Marcos Jr.
Sa exclusive interview sang Bombo Radyo kay Rep. Baronda, iya ginpahayag nga daku ang iya pagpanginbulahan sa pagbanggit ni Presidente Marcos sang pila ka prayoridad sang gobyerno nga kaangut sa mga proyekto nga iya man ginatukod sa Iloilo City.
Suno sa iya, nalipay gid siya sang gin-mention ang pagtukod sang evacuation centers, paghatag sang daku nga importansya sa sports development kag Palarong Pambansa, pagpabakod sang healthy lifestyle, kag pagpadayon sang suporta sa mga athletes.
Ginkalipay man niya ang plano sang gobyerno nga palaparon pa gid ang implementasyon sang Universal Health Care, expanded social services, kag programa sa agrikultura. Suno kay Baronda, ini nga mga inisyatibo nagtupong sa iya mga ginsuguran sa syudad, lakip na ang natapos na nga Health Center kag ang padayon nga konstruksyon sang Cancer Center.
Ginpahayag man ni Baronda nga isa sa ginatutukan nila subong amo ang pagtukod sang tertiary hospital, pagprotektar sa palibot (environment), kag ang budget deliberation para masiguro nga magapadayon ang mga proyekto nga nasuguran.
Ginbuyagyag man niya nga personal siya nakig-istorya kay Presidente Marcos kag sa First Lady Liza Marcos, nga nagsiling nga “Yes, tatapusin natin ‘yan,” kabahin sa mga proyekto nga dapat matapos.
Natingala man si Baronda bangud wala nabanggit ang Panay-Guimaras-Negros Bridge sa SONA, apang suno sa iya, ginalantaw niya ini nga isa gihapon ka prayoridad sang administrasyon.
Gintamyaw man niya ang importansya sang transparency, nga suno sa iya kinahanglan sa tsakto nga programa kag serbisyo sang gobyerno.
Ginsiling pa ni Baronda nga bilang isa ka Deputy Majority Floor Leader, madamo na subong sang iya responsibilidad sa Kamara, apang nagapaninguha gihapon siya nga mapuli kada katapusan sang semana agud personal niya masaksi ang kahimtangan sang mga pumuluyo sa Iloilo City.
