Nagmando na ang Office of the Ombudsman sa anay regional director sang Department of Public Works and Highways (DPWH) 6 kag mga district engineers sa Western Visayas nga magpasa sang counter-affidavit kaangot sa graft cases nga ginpasaka sang corruption watchdog batok sa ila.

Sa mga dokumento nga ginpakigbahin ni Crimes and Corruption Watch International, Inc. (CCWI) president Carlomagno Batalla, nakaplastar nga naghatag ang Ombudsman sang 10 ka adlaw agud nga makasabat ang respondents.

Lakip sa nalista nga mga pangalan amo sanday former DPWH 6 Regional Director Sanny Boy Oropel; mga district engineers nga sanday Gener Abergas, Robert Palmera, Randolfo Melosantos, Allan Rey Pajimna, Roy Pacanan, Ethel Morales, kag Bernadette Betsy Uy; kag mga opisyal sang DPWH Western Visayas Bids and Awards Committee nga sanday Mary Grace Bulaquina-Hachuela, Marilou Zamora, Ormel Santo, Gladwyn Ledesma, Roland Rainier Victorino, kag Ricardo Gutierrez.

Yara man sa respondents si Helen Edith Lee Tan, ang presidente sang construction firm nga International Builders Corporation (IBC).

Nag-ugat ini sa gina-alegar sang watchdog nga iregularidad sa multibillion-peso projects sang 2024.

Base sa complaint sang CCWI, gin-akusaran ang DPWH nga nagahatag sang pabor sa IBC matapos nag-award sang mga proyekto sa amo nga kontraktor apisar sang mga kontrobersiya sa duha ka proyekto nga amo ang Ungka kag Aganan flyovers.

Partikular nga gin-akusaran sang CCWI ang DPWH officials nga nagalapas sa layi kaangot sa government procurement, graft, kag sa Code of Conduct and Ethical Standards for Public Officials and Employees.

Base pa sa ginreklamo ni Batalla, halin sang 2016-2024, nakadaog ang IBC sang ginabanta nga P40 billion nga balor sang DPWH VI projects.

Ginsiling man sa ila press conference sang Mayo 22, 2025 nga nasakop sa complaint ang 26 infrastructure projects nga gin-award sang 2024 sa amo nga kontraktor nga amo man ang sa likod sang kontrobersyal nga Aganan kag Ungka flyovers sa Jaro, Iloilo City kag sa banwa sang Pavia.

Una naman nga nagpaathag si Oropel nga klaro ang ila nga bidding process kag nakabase sa lehitimo nga mga guidelines. Ginlaragway man sini anay ang kaso nga “harassment” kag nagpahayag man nga kumpyansa siya nga ibasura sang Ombudsman ang kaso kaangay sa nagligad nga charges bangud sa kakulang sang basehan.#