Ginatinguhaan sang Iloilo City Police Office (ICPO) nga mapunggan ang kriminalidad sa syudad paagi sa paghatag sang oportunidad sang palangabuhian sa mga pumuluyo nga nagakinahanglan sang bulig, paagi sa paglunsar sang Pag-AMLIG Livelihood Program.
Ang Pag-AMLIG nagakahulugan sang “Pasanyugon Aton Mamumugon, Mangingisda, Mangunguma sa Laylayan Itib-ong kag Gugmahon”.
Sa interview sang Bombo Radyo Iloilo kay Police Colonel Wilbert Parilla, City Director sang ICPO, iya ginpahayag nga isa ini sa mga inisyatibo sang pulisya agud mabuligan ang mga pumuluyo nga bangud sa kapigaduhon mahimo mag-engage sa mga ilegal nga mga aktibidad.
Suno kay Parilla, nakita nila nga ang kapigaduhon isa sa mga rason nga nagatulod sa mga tawo nga maghimo sang krimen, gani handum sang ICPO nga mahatagan sila sang oportunidad nga makapangabuhi sang insakto.
Dugang pa niya, nagalaom sila nga mangin mabinungahon ang bulig sa mga pumuluyo paagi sa pagpakig-angot man sa nagkalain-lain nga ahensya sang gobyerno, lakip na ang Department of Labor and Employment (DOLE), Department of Social Welfare and Development (DSWD), Department of Agriculture (DA), Bureau of Fisheries and Aquatic Resources (BFAR), kag iban pa nga partner agencies.
Ginapanawagan man ni Parilla ang kooperasyon sang mga benepisyaryo agud mapuslan nila ang mga oportunidad kag serbisyo nga ihatag sa ila sang gobyerno.
Ginpatigayon ang paglunsar sang programa sa Tui-Cho Teg-Ana Ros Foundation Integrated Farm School sa Barangay Lanit, Jaro, Iloilo City, subong nga adlaw, Oktubre 22, 2026.
By: Bombo Glenette Delit
