Nagpanglakaak na ang kaso sang whooping cough ukon pertussis sa Japan.
Base sa preliminary data halin sa Institute for Health Security, halin sang Hulyo 14-20, naglab-ot sa 3,908 ka mga kaso ang na-report sang mga ospital kag clinic. Record-high ini sa ika-lima na nga sunod-sunod nga semana.
Bangud sini, nagdangat na ang cumulative total sa 52,490 ka mga kaso.
Suno kay Bombo Josel Palma, international correspondent sa Japan, mas mataas ang numero nga ini sa 16,845 cases nga napagkit sa bilog na nga tuig sang 2019.
Nahibaluan nga ang pertussis isa ka highly infectious bacterial disease nga nagapakita sang mga sintomas kaangay sang trangkaso kag naga-amat-amat lala ang pag-ubo.
Ang mga lapsag amo ang masami naga-develop sang malala nga mga kumplikasyon kaangay sang pneumonia kag encephalitis nga mahimo mangin rason sang kamatayon.
