Pinal na kag opisyal ang desisyon nga i-postpone ang barangay and sangguniang kabataan elections (BSKE) subong nga tuig.
Ini matapos ginpirmahan na ni President Ferdinand Marcos Jr. ang Republic Act No. 12232 kun sa diin sa baylo nga sa December 1, 2025 ang eleksyon, ginsaylo ini sa una nga Lunes sang November 2026.
Matupa ini sa November 2 nga amo man ang pag-obserbar sang All Souls’ Day.
Sa idalom sini nga layi, nakasaad man nga patigayunon ang mga masunod nga BSKE sa kada apat ka tuig.
Nakabutang man diri nga ginpalawig ang mga termino sang barangay and SK officials sa apat ka tuig, halin sa anay tatlo ka tuig nga nakabutang sa Local Government Code of 1991.
Mahimo makaserbe ang barangay officials sang tatlo ka sunod-sunod nga termino ukon tubtub sa 12 ka tuig sa pareho nga posisyon; samtang ang termino naman sang SK officials ang ginbuhinan sa maximum of one.
Ang incumbent elective barangay officials nga nagapangalagad sa ila nga third consecutive term sa pareho nga posisyon ang indi eligible nga magpadalagan sa pareho nga pwesto sa November 2026 BSKE.
Una na nga ginpahayag sang president nga kinahanglan ipaiway ini nga piniliay subong nga tuig bangud importante nga pasulabihon ang labing-una nga parliamentary elections sang Bangsamoro Autonomous Region in Muslim Mindanao (BARMM). Matabo ang BARMM parliament polls sa Oktubre 13 nga suno sa presidente indi na masarangan sang Comelec kun may masunod pa gid nga eleksyon.#
