Gintawag ni President Ferdinand ”Bongbong” Marcos Jr. nga isa ka akto sang economic sabotage ang dalagko nga mga maanomaliya kag ghost flood control projects sa pungsod.
Suno kay Marcos, kun kinahanglan pasakaan sang kaso ang mga involved sa palpak nga mga proyekto, handa gid ini.
Ginhalimbawa pa sini ang gin-inspect niya nga reinforced concrete riverwall project sa Purok 4 sa Barangay Piel, Baliuag, Bulacan nga suno sa iya, ehemplo sang falsification of documents bangud base sa records, natapos na ini apang sang iya ginlantaw, wala pa ini nakompleto.
Suno sa president, kun insakto ang pagpatuman sang sini nga mga proyekto, nabuhinan kuntani ang utang sang Pilipinas.
Gin-athag naman ni Marcos nga ang pagpasaka sang kaso ang magadepende sa findings sang legal team nga nagatrabaho sini.
Sa iya naman paglantaw sa nasambit nga proyekto sa Bulacan, ginsiling sang president nga labaw sa pagkadismaya, tuman nga kaakig ang iya nabatyagan bangud sa palpak nga proyekto.
