Napilian ang pelikula nga “Green Bones” bilang opisyal nga entry sang Pilipinas para sa 2026 Oscars ukon ang prestihiyoso nga 98th Academy Awards sa kategorya nga International Feature Film.
Bida sa sini nga multi-awarded film sanday Dennis Trillo kag Ruru Madrid.
“A story worth sharing with the world — reminding us that even in the darkest places, humanity endures. ‘Green Bones’ challenges us to look deeper and question our ideas of justice and redemption,” base sa social media post sang GMA Pictures.
Antes napili ang Green Bones, nangin contender man ang “Food Delivery,” “Sunshine,” “Hello Love Again,” “Magellan,” “Song of the Fireflies,” kag “Some Nights I feel Like Walking.”
Sa Metro Manila Film Festival 2024, naghakot ang Green Bones sang anum ka awards lakip na ang Best Actor para kay Dennis; Best Supporting Actor para kay Ruru; kag ang ang Best Picture.
Sa Disyembre mahibaluan kun sulod sa shortlist ini nga Filipino film. Hiwaton naman ang seremonya sa March 15, 2026.
Nahibaluan nga may 34 cumulative submissions na ang Pilipinas sa sini nga category, apang wala pa gid sang na-nominate sa Oscar. Ang 2024 submission amo ang And So It Begins.#
