Padayon sa gihapon ang konstraksyon sang Phase II sang Iloilo City District Jail Building sa Barangay Buntatala, Leganes, apang wala pa ini natapos bisan pa nga ginplano nga matapos sa Oktubre 5, 2025.
Ang proyekto ginapangunahan sang Amethyst Horizon Builders and General Contractor, Inc., nga konektado sa pamilya Discaya, partikular kay Cezarah “Sarah” kag Pacifico “Curlee” Discaya II nga may kalabutan sa madamo nga mga konstruksyon nga proyekto, lakip na ang maanomalya nga mga flood control infrastructure.
Ang Phase II may kabug-usan nga budget nga P154,400,000 kag kabahin sang mas daku nga plano sang Bureau of Jail Management and Penology (BJMP)-6.
Gin-groundbreaking sang Hunyo 6, 2024 ang P226.37-million nga facility complex nga magatukod sang female dormitory kag anum pa ka building para sa administration, visitor processing, health services, commitment, visitation kag kitchen.
Ginpahayag sang lokal nga otoridad nga padayon pa ang trabaho sa lugar kag ginahingyo nga matapos ini sa ginsugid nga petsa.
Ginlantaw sang BJMP nga ang proyekto magahatag sang mas maayo nga pasilidad para sa mga persons deprived of liberty sa syudad.
Matandaan nga ang funding sang proyekto naghalin sa Republic Act No. 11975, General Appropriations Act of 2024 kay member of the House appropriations committee and chief sponsor of the funding, Uswag Ilonggo Party-list Congressman James ‘Jojo’ Ang Jr., nga ang total nga kinahanglanon nga pondo para sa BJMP amo ang P581 milyon, kag ang nabilin nga pondo ginlakip iba pa nga appropriations.
Ginpahayag man sang BJMP-6 Regional Director nga ang Iloilo City government nakabakal sang 2.5 hectares nga duta halin sa lokal nga gobyerno sang Leganes para sa proyekto.
Ang bag-o nga pasilidad ginlantaw nga maka-accommodate sang 2,000 ka inmates .
Ginpasiguro sang BJMP nga ang pasilidad magahatag sang edukasyon kag livelihood programs para sa mga person’s deprived of liberty (PDLs), upod ang Technical Skills Development Authority kag Department of Labor and Employment, agud mabuligan sila sa pagbalik sa komunidad.
