Nag-manifest si Iloilo City Councilor Nene Dela Llana nga importante ang paglantaw sa “interes sang publiko” kag “mga ebidensya” kun bukaron man kag isapubliko ang mga “sikreto” sa syudad sang Iloilo.
Kaangot ini sa privilege speech sang nagligad nga Oktubre 15 nga gin-deliver ni Councilor Sheen Marie Mabilog sa session sang konseho.
Sa amo nga speech nga may tig-ulo “No Secrets in Iloilo City”, ginpabutyag ni Mabilog ang freedom of information sa pag-sabat sa mga pamangkot nga naangot sa mga proyekto sa syudad — kaangay sang flood control, pagpa-atop sa overpass sa Diversion Road sa Mandurriao, kag waiting shed sa Katilingban sa Molo nga nagalab-ot sa halos P800,000 ang balor.
Sa manipestasyon ni Dela Llana, ginklaro sini nga suportado niya ang panawagan sa transparency sa syudad.
Apang dugang niya, indi lang simple nga pagbulgar ang tinaga nga “transparency” kundi dapat nga tun-an, kag dapat nga nahangpan ang impormasyon kag kun paano ini gina-manage.
“I know a lot of secrets here in Iloilo City. Pero ginabutang ko gid pirme sa ulo ko: ang sikreto nga ina bala, may ebidensya ka? Ang sikreto na bala, is it of national interest?,” pahayag sini.
“May secret ko nga nabal-an nga may isa ka public official, may bata pero wala tatay. Pero wala kita labot da, because as long as indi concubinage or wala sang kaso, indi na ya of public interest. Wala kita da labot because indi na ya public interest,” suno pa sa konsehal.
Suno kay Dela Llana, madamo sang sikreto sa syudad, apang kinahanglan nga sala-on kag lantawon man kun may interes bala diri ang publiko ukon ang mga Ilonggo.
“We must try to understand nga ang sikreto, although ibunyag ta, importante na bala nga dapat ibunyag? Is it of national interest?,” suno sa iya.
Nahibaluan nga subong nga semana, ginpasar man sang Iloilo City Council sa una nga pagbasa ang proposed Freedom of Information (FOI) Ordinance. Isa ini ka landmark measure agud nga mangin bukas ang records sang Iloilo City Hall para mapisa-pisa man sang publiko kaangay sang government documents, kontrata kag spending records.#
