Nagmandu ang Pre-Trial Chamber sang International Criminal Court (ICC) nga ipaidalom sa medical examination si anay Presidente Rodrigo Duterte.
Ini agud madeterminar kun fit bala ang anay presidente nga magpaidalom sa pre-trial proceedings lakip na sa confirmation of charges.
Naghatag sang order ang tatlo ka mga judge nga sanday Judges Iulia Antoanella Motoc, Reine Adélaïde Sophie Alapini-Gansou, kag María del Socorro Flores Liera, agud nga ma-facilitate sang Registry ang medical examination.
Dapat man nga i-provide ang kumpleto nga mga record ni Duterte sa panel sang tatlo ka independent medical experts.
Ini nga mga eksperto ginabug-usan sang isa ka forensic psychiatrist, isa ka neuropsychologist, kag isa ka geriatric and behavioral neurologist.
Sila ang maga-assess kun may kondisyon sa ikaayong-lawas si Duterte nga mahimo makaapekto sa iya nga partisipasyon sa nagapadayon nga pre-trial phase.
Ini man nga mga eksperto ang maga-rekomendar sang special measures nga kinahanglan agud matatap kun may kondisyon si Duterte sa tion sang proceedings.
Wala ginsapubliko ang pangalan sang mga doktor, apang suno sa ICC, ini nga tikang ang kabahin sang pagpakita sang “fair trial rights” para sa former Philippine leader.
“The Chamber instructs the Panel to only utilise the information it receives for the purpose of formulating its reports, and orders it not to divulge any information without prior approval of the Chamber. Moreover, in order to maintain the impartiality of the Panel, the parties and participants shall refrain from any contact with the appointed experts,” kabahin sang desisyon.
Matandaan nga ginbasura sang ICC ang request sang kampo ni Duterte para sa interim release.
Nauna na nagpahayag ang defense team nga nagamalipaton na si Duterte kag indi na ini makadumdom sa mga hitabo, sa mga petsa, ukon mangin sa iya nga pamilya. Sa statement anay ni Vice President Sara Duterte, ginsiling sini nga may source siya nga nagsugid nga nasapwan man anay ang iya amay nga wala sang animo samtang yara sa detention cell.#
