Nagbaskog pa kag nahimo nga Severe Tropical Storm si Bagyo Tino samtang yara ini sa Philippine Sea.
Base sa alas singko sa hapon nga bulletin sang state weather bureau subong nga Nobyembre 2, nakit-an ang sentro sang bagyo sa kalayuon nga 805 km nasidlangan sang Eastern Visayas.
Dala sini ang kabaskugon sang hangin nga 95 km/h malapit sa sentro kag pagmadlos nga tubtub sa 115 km/h. Nagahulag ini sa direksyon nga pa-nakatundan sa kadasigon nga 30 km/h.
Napaidalom sa Signal number 1 ang pila ka areas sa Visayas lakip na ang Eastern Samar, Northern Samar, Samar, Biliran, Leyte, Southern Leyte, kag ang Camotes Islands. Sa Mindanao, ginpasaka man sa Wind Signal number 1 ang Dinagat Islands kag ang Surigao del Norte.
Sa track forecast, magahulag si Tino pa-nakatundan sa masunod nga tatlo ka adlaw. Ginalantaw nga maga-landfall ini sa Eastern Samar ukon sa Dinagat Islands buwas sa gab-i ukon sa Martes sang kaagahon. Pagkatapos sang landfall, magalabay ang bagyo sa Visayas kag northern Palawan antes magtuhaw sa West Philippine Sea sa Myerkules sang aga ukon sa hapon.
Suno pa sa weather bureau, magapadayon sa pagbaskog ang bagyo kag magalab-ot sa typhoon category sa masunod nga 24 oras. Wala ginadula ang posibilidad nga mahimo ini nga super typhoon base sa alternate scenarios kag sa climatological data.
Si Bagyo Tino amo ang ika-20 nga bagyo sa Pilipinas sa bilog nga 2025 kag una nga bagyo subong nga Nobyembre. Kaina sang aga sang nagsulod ini sa Philippine Area of Responsibility (PAR).#
