Ginpirmahan na nanday Department of National Defense (DND) Secretary Gilberto Teodoro Jr. kag Canadian Minister of National Defense David McGuinty ang maragtason nga Status of Visiting Forces Agreement (SOVFA) sa tunga sang Pilipinas kag Canada.
Suno kay Teodoro, ang SOVFA nagahatag sang legal nga basehan para sa Philippine kag Canadian Armed Forces sa pagpatigayon sang joint exercises, kag magapabaskog sang interoperability kag kooperasyon sang duha ka military forces.
Ginpahayag niya nga ginahatagan importansya sang kasugtanan ang pagsalig kag kumpiyansa sa tunga sang duha ka pungsod.
Ini ang una nga SOVFA nga ginsudlan sang Canada sa isa ka Indo-Pacific state.
Ang pundasyon sang SOVFA amo ang pagpreserba sang international order nga base sa layi, kag ang pagrespeto sa soberanya kag dignidad sang mga estado kag tawo, upod ang ila mga katungdanan, suno kay Teodoro.
Ang isa ka estado mahimo lang mapamatud-an nga seryoso sa pagprotekta sang international law kun ginaprotektahan sini ang katungdanan sang iya kaugalingon nga pumuluyo.
Ginkilala naman ni McGuinty ang Pilipinas sa pagsunod sa international law.
Ang Pilipinas nagpakita sang matuod nga liderato sa pagpanguna sa pagpasiguro sang kalinong kag seguridad sa rehiyon.
Ginpahayag man ni Teodoro nga ang SOVFA kinahanglan anay nga i-ratify ni President Ferdinand Marcos Jr. kag i-concur sang Senado.
Ginsiling niya nga ang VFA sa Canada mangin lain sa iban nga kasugtanan nga ginsudlan sang Pilipinas, bangud sang specific specializations kag distinct experiences sang mga Armed Forces sang duha ka pungsod.
