Wala pa sang pormal nga koordinasyon ukon diskusyon sa committee level sang Iloilo City Council ang plano nga pag-deputize sa mga barangay officials bilang traffic enforcers sa tagsa ka barangay sa Iloilo City.
Sa interview sang Bombo Radyo kay Councilor Atty. Sedfrey Cabaluna, Committee on Transportation Chairperson, iya ginpahayag nga nabatian lamang niya ang nasambit nga proposal paagi sa media kag sa State of the City Address (SOCA) ni Mayor Raisa Treñas, apang wala pa ini naistoryahan sa committee level agud matun-an ang posible nga epekto sini sa mga barangay.
Ginpahayag sang konsehal ang iya apprehensions sa plano, bangud madamo na sang responsibilidad ang mga barangay officials, lakip ang legislative kag judicial functions, pati na ang nagkalain-lain nga social welfare programs nga ginapatuman sa ila tagsa ka komunidad.
Dugang pa sini, indi man malikawan nga may politikal nga konsiderasyon sa pagpatuman sang traffic enforcement, bangud ang mga barangay officials mga elected officials man.
Ginalantaw man sini ang posibilidad qanga magresulta sa reklamo ukon alegasyon sang politikal nga pagpabor sa pagdakop ukon indi pagdakop sang mga violators.
Suno kay Cabaluna, kinahanglan anay nga mapatawag ang mga barangay officials kag komunidad agud mabatian ang ila kahandaan nga magbaton sang dugang nga responsibilidad kag masabat ang mga kabalaka sa implementasyon sini.
Samtang, sa baylo nga pag-deputize sang mga barangay officials bilang traffic enforcers, ginalantaw sang konsehal ang paghimo sang separado nga ordinansa nga magapatuman sang mas institutionalized nga paggamit sang CCTV cameras kag non-contact apprehension system.
Paagi sini, mahimo nga mangin basehan ang video footage halin sa CCTV cameras ukon dashcams sa pag-isyu sang traffic citation ukon pagsaka sang kaso batok sa mga nagalapas sa traffic laws kag ordinances.
Gin-athag ni Cabaluna nga mas maayo ini nga sistema bangud may dokumentasyon sang aktuwal nga paglapas kag malikawan ang alegasyon sang pagpabor ukon pagpili lamang sang mga pagadakpon.
Sa karon, ginatun-an pa ang non-contact apprehension system samtang wala pa sang final nga desisyon sa proposal nga pag-deputize sang mga barangay officials.#
