Ginpahangop sang isa ka abogado kun ngaa wala sa gihapon ginapaguwa tubtub subong ang pangalan sang mga testigo nga magapungko kun magsugod na ang trial ni former President Rodrigo Duterte sa International Criminal Court (ICC).
Ini kasunod sang natabo nga pila ka beses kag malawig nga private ukon closed sessions sa ICC Trial Chamber III sang ginpatigayon ang ika-lima nga status conference kahapon.
Ginahimo ini sang Chamber kun may mga gina-istoryahan sila nga pribado ukon confidential in nature.
Sa interview sang Bombo Radyo kay Atty. Kaiser Cordero, Founder and Chief Executive Officer sang Cordero and Associates nga isa sa mga personal nga nagtambong sa amo nga status conference sa The Hague, Netherlands, iya ginpahayag nga bisan sila nga yara na mismo sa courtroom ang indi man makabati sa ginahambalan kun ginapatigayon na ang pribado nga session.
Ginpaathag sini nga apisar nahibaluan na sang mga partido kag sang mga abogado kun sin-o ini nga mga testigo, wala ini ginasapubliko agud nga malikawan nga ma-intimidate ukon mapahog ang mga witness.
“Although there’s prior disclosure naman to parties, especially to lawyers, [but] at least for the public, maybe they don’t want disclosure ahead of their respective testimonies because they are avoiding situations where, like in other countries or other criminal trial they had here, that witnesses are intimidated. That’s the precise reason I see that witnesses in the time being are not disclosed,” pahayag sini.
Ang hearing kahapon amo ang katapusan nga status conference para sa mga partido antes magsugod ang trial sa Nobyembre 30.
Gin-waive ni Duterte ang iya kinamatarong nga magtambong sa amo nga hearing matapos nga nagpakita sa third and fourth status conferences.
Ang status conference amo ang lugar kag tyempo kun sa diin may diskusyon ang mga kampo kaangot sa kaso antes magpadayon sa full trial. Ini agud masiguro nga mangin matalunsay na ang schedule kag iban pa nga legal matters antes ang actual trial days.#
