Napatay sa ospital samtang yara sa kustodiya sa The Hague, Netherlands ang isa sa nagapanguna nga suspek sa 1994 Rwandan genocide nga si Felicien Kabuga.
Natabo ang iya kamatayon tatlo ka tuig matapos gindeklarar sang korte nga indi na siya fit agud nga magpadayon sa trial sang iya kaso bangud sang iya ginasuprer nga dementia.
Ginkumpirmar sang International Residual Mechanism for Criminal Tribunals nga napatay si Kabuga sa isa ka ospital sang Sabado, Mayo 16, sa edad nga 90 anyos.
Dugay na nga ginakabig si Kabuga nga isa sa mga pugante sa bilog nga kalibutan bangud sang iya nga papel sa pagpondo kag pagsuporta sa genocide sa Rwanda sang 1994 kun sa diin ginabanta nga kapin 800,000 ka tawo ang napatay sa sulod lamang sang pila ka bulan.
Gin-akusaran si Kabuga bilang isa sa mga nasa likod sang Radio-Television Libre des Mille Collines ukon RTLM nga isa ka estasyon sang radyo nga ginapatihan nga nagpanawagan sa mga ethnic Hutu nga patyon ang mga Tutsi sa tion sang genocide.
Magluwas pa diri, ginapatihan man nga nagpanghatag siya sang mga machete kag nagsuporta sa mga grupo nga nalakip sa masangkad nga pagpamatay.
Sang 2020, nadakpan si Kabuga sa Paris, France matapos ang halos tatlo ka dekada nga pagpanago gamit ang nagkalainlain nga peke nga identity kag pasaporte.
Pagkatapos siya nadakpan, gindala siya sa The Hague kun sa diin gin-atubang niya ang mga kaso nga genocide, conspiracy to commit genocide, incitement to genocide, kag crimes against humanity lakip ang murder kag extermination.
Ginpanginwala naman ni Kabuga ang tanan nga akusasyon kag nag-file sang not guilty plea sa korte.
Sang 2023, ginpauntat sang mga hukom ang trial matapos ideklarar nga indi na siya physically kag mentally fit nga mag-atubang sa korte.
“On 8 September 2023, following the Appeals Chamber decision of 7 August 2023, the Trial Chamber issued a decision indefinitely staying the proceedings as Mr. Kabuga was considered unfit to stand trial, and ordering that he remains in detention at the UNDU, pending the resolution of the issue of his provisional release,” suno sa statement sang UN-International Residual Mechanism for Criminal Tribunals. “At the time of his death, Mr. Kabuga was awaiting provisional release to a State willing to accept him on its territory.”
Nagmandu naman ang presiding judge nga si Graciela Gatti Santana sang maid-id nga imbestigasyon kaangot sa kabangdanan kag mga sirkumstanya sa kamatayon ni Kabuga.#
