Lauman nga may mga pagbag-o sa schedule sang trial ni former President Rodrigo Duterte nga magasugod na Nobyembre 30 sa International Criminal Court (ICC) Trial Chamber III.
Sandig sa naistoryahan sa status conference kahapon, may anum ka oras nga schedule halin sa amo nga adlaw tubtub sa Christmas break sang ICC sa tunga-tunga sang Disyembre.
Ang kada adlaw sang trial ang bahin-bahinon sa apat ka mga session nga nagalawig sang tag-isa ka oras, kag i-divide man sa isa ka oras nga lunch break, kag duha ka mas manubo nga mga recess sa aga kag sa hapon.
Magabukas ang trial sa 10:00 sa aga oras sa Netherlands ukon 5:00 sa hapon oras sa Pilipinas; kag magatakop naman 4:00 sa hapon oras sa Netherlands, ukon 11:00 sa gab-i oras sa Pilipinas agud nga may tyempo pa nga dal-on si Duterte pabalik sa detention facility nga malapit sa ICC.
Apang suno kay Atty. Kaiser Cordero, Founder and Chief Executive Officer sang Cordero and Associates nga isa sa mga personal nga nagtambong sa 5th Status Conference sa ICC sa The Hague, indi pa pinal ang amo nga schedule kag ginalauman ang submissions, motions, kag filings kaangot sa adjustment sa tyempo.
Nahinambit sini ang diskusyon pananglitan may ipresentar nga mga testigo paagi lamang sa video conferencing ukon ang ginatawag sang ICC nga audio video link ukon AVL.
Suno kay Atty. Cordero, posible ang adjustments nga magadepende kun sin-o kag kun diin ini maga-testify.
“The court said that it won’t allow testimony later than 8:00 p.m. in the Philippines. So the court might convene earlier, maybe 7:00 a.m. here to accommodate presentation of witnesses from the Philippines through video con link,” pahayag sini samtang yara sa The Hague.
Nahibaluan nga naghatag man sang instruction si Trial Chamber III Presiding Judge Joanna Korner nga agud nga ma-preserve ang trial efficiency kag ma-manage ang courtroom presentation, dapat nga pasulabihon sang prosecution ang in-person testimonies ukon ang mga testigo nga magaatubang sang personal sa korte, antes magsaylo sa mga testigo nga magaagi sa remote links.
Ginplastar man sa amo nga status conference ang pagpanghangkat sa operasyon kun may ibutang nga remote witnesses ilabi na sa pito ka oras nga time difference sang The Hague kag Pilipinas.
Ang hearing kahapon amo ang katapusan nga status conference para sa mga partido antes magsugod ang trial sa Nobyembre 30.
Gin-waive ni Duterte ang iya kinamatarong nga magtambong sa amo nga hearing matapos nga nagpakita sa third and fourth status conferences.
Ang status conference amo ang lugar kag tyempo kun sa diin may diskusyon ang mga kampo kaangot sa kaso antes magpadayon sa full trial. Ini agud masiguro nga mangin matalunsay na ang schedule kag iban pa nga legal matters proceed antes ang actual trial days.
