Ginbalibaran sang Trial Chamber III sang International Criminal Court (ICC) ang request sang mga abogado nga nagarepresentar sa mga biktima nga gamiton ang Tagalog sa pila ka bahin sang ila opening statement.
Ini ang isa sa mga desisyon nga ginhimo sang trial chamber sa ikalima nga pre-trial conference sa The Hague, Netherlands, may kaangtanan sa kaso nga crimes against humanity nga ginapangatubang ni former President Rodrigo Duterte.
Wala nag-atubang si Duterte sa nasambit nga conference subong nga hapon matapos ginpahanugutan sang korte ang request sang iya defense nga indi siya magtambong.
Suno kay Presiding Judge Joanna Korner, magadugang sang komplikasyon sa mga aplikasyon sang mga biktima kag magapataas sang gasto sa pagtililipon ang paggamit sang Tagalog bangud kinahanglan pa ini nga ipa-translate.
Nahibaluan nga ang nagpangabay sa paggamit sang Tagalog amo si Public Counsel for Victims Paolina Massidda agud mas husto nga maipahayag ang mga istorya kag eksperyensya sang mga biktima.
Gin-athag sini nga limitado lamang ang paggamit kuntani sang Tagalog sa mga bahin sang opening statement nga naga-quote sa mga pahayag sang mga biktima.
Suno sa Rome Statute, ang opisyal nga mga lenguahe sang ICC amo ang English kag French.
