Posible nga matapos antes ang Nobyembre 30 ang impeachment trial ni Vice President Sara Duterte kun mapresentar sang iya defense team ang mga ebidensiya sa sulod sang napulo ka bug-os nga adlaw sang trial.
Sandig ini kay House lead prosecutor kag Batangas Representative Gerville Luistro subong nga adlaw, Nobyembre 2, samtang ginahulat ang pag-resume sang proceedings.
Suno sa lead prosecutor, posible nga mabuhinan ang 30 ka adlaw nga ginpangayo sang depensa matapos gin-atras sang House prosecution panel sang Oktubre 13 ang tatlo sa apat ka Articles of Impeachment batok kay Duterte. Lakip sa mga gin-withdraw nga alegasyon ang indi husto nga paggamit sang confidential funds, pagpanuhol, kag seryoso nga pagpamahog.
Apang gin-athag ni Luistro nga magadepende gihapon sa pag-aprubar sang Senate impeachment court ang pinal nga schedule sang trial, lakip na ang kadamuon sang mga testigo nga ipresentar sang depensa.
“Posible po na matapos ito bago ang katapusan ng Nobyembre,” suno kay Luistro.
“We have reason to believe na ito pong 30 trial days na ito ay malaki ang mababawas. Sana kalahati na lang o sampu na lang,” dugang sini.
Kun maglampas sa ginapaabot nga napulo ka adlaw ang pagpresentar sang mga ebidensiya sang defense team, posible nga magpadayon pa tubtob Disyembre ang impeachment trial.
Nagalaum naman si Luistro nga matapos ang trial antes ang Paskwa agud may katapusan na ang nasambit nga kaso kag makapadayon na ang tanan.
“But at any rate, we are all hoping and praying na sana naman bago mag-Pasko ay tapos na ang impeachment trial na ito para magkaroon tayo ng closure, and we can all move on,” suno kay Luistro.
Sa karon, temporaryo anay nga gin-untat ang impeachment trial agud mahatagan sang tion ang deliberasyon sang mga komite sang Senado sa ginaduso nga national budget para sa 2027.
Ginalauman nga liwat nga magabukas ang Senate impeachment court sa Nobyembre 9, alas-10 sang aga.#
