Magapasaka subong nga adlaw sang kaso-kriminal ang bana ni Vice President Sara Duterte batok sa pila ka ahensya sang gobyerno kag sa mga myembro sang House Committee on Justice bangud sang pagbulgar sang confidential bank records.
Ang nakabutang nga kasuhan ni Atty. Manases “Mans” Carpio amo sanday Bangko Sentral ng Pilipinas (BSP) Governor Eli Remolona Jr. kag si Anti-Money Laundering Council (AMLC) Executive Director Ronel Buenaventura.
Kasuhan man sini sanday House justice committee chairperson Rep. Gerville Luistro kag ang mga myembro sang panel nga sanday Rep. Percival Cendaña, Rep. Chel Diokno, kag Rep. Leila De Lima.
Suno sa mga abogado ni Carpio, ang iya bank records ang protektado kuntani sa idalom sang Anti-Money Laundering Act (AMLA); Bank Secrecy Law; kag Data Privacy Act.
Suno pa sa statement sang kampo ni Carpio, magapasaka ini sang kaso agud depensahan indi lamang ang iya asawa kag ang pamilya Duterte kundi ang banking and financial community.
Gina-insister sang bana sang vice president nga sa idalom sang AMLA, “absolute” kag wala sang exception ang confidentiality sang bank records agud masiguro ang seguridad, ang stability, kag ang integridad sang financial system.
Gin-alegar man ni Carpio nga gin-leak sang AMLC kag sang House Committee on Justice ang pribado nga transaction records lakip na ang insurance payments, time deposits, investments, kag utility bill payments.
Dugang sini, ginhimo ang amo nga leak para sa “black propaganda” kag “political harassment” sa baylo nga isa ka lehitimo nga regulatory action.
Gin-alegar man ni Carpio nga gina-gamit lamang ang AMLC bisan pa iligal kag nagasupak sa layi agud nga makapreparar sa 2028 national election.
Ini nga statement sang kampo ni Carpio ang kasunod sang ginbuyagyag sang AMLC nga na-record sa idalom sang pangalan sang mag-asawa nga Duterte kag Carpio ang bank transactions nga nagalab-ot sa P6.7 billion kag gina-classify nila bilang covered kag suspicious.#
