Gin-athag sang Anti-Money Laundering Council ukon AMLC nga wala sang rekord sa bangko nga nagapakita sang koneksyon sang mga contractor ukon sang Department of Public Works and Highways (DPWH) kay suspended Leyte Representative Martin Romualdez.
Suno kay AMLC financial investigator Atty. Jan Mark Busa, ang P560.5 million remittances nga nagsulod sa mga bank account ni Romualdez halin Setyembre 2022 tubtob Marso 2025 ang wala sang koneksyon sa mga flood control project.
Ginpahayag niya ini sa tion sang hearing sa bail petition ni Romualdez nga may kaangtanan sa P7.4-bilyon nga kaso nga plunder.
Ginkumpirma man ni Busa nga wala sang nakita ang AMLC nga pagsaylo sang kwarta halin sa iya kapareho nga akusado nga si Zaldy Co pakadto kay Romualdez.
Sa kabug-usan, 1,951 ka financial transactions ni Romualdez ang gin-usisa sang council sa amo nga tion.
Ginpahayag ni Busa nga dako ang kinalain sa tunga sang P560.5-million nga narecord nga remittances kag sang P7.4 bilyon nga ginapahayag sang mga prosecutor nga ginkawat sini.
Dugang pa niya, wala man sang rekord ang AMLC nga nagapakita nga nagpadala si Romualdez sang kwarta sa Golden Pheasant, ang kompanya nga ginatudlo nga gin-gamit sa pagbakal sang propedad sa South Forbes Park, Makati City.
Ginpresentar ang ini nga mga pahayag sa cross-examination ni Busa sang abogado ni Romualdez samtang nagapadayon ang hearing sa iya bail petition.
