Nasalbar sang Philippine Coast Guard (PCG) ang lima ka turista matapos sila maabtan sang tuman ka baskog nga hampak sang balod samtang nagalangoy sa dagat nga ginabanta mga 20 tubtob 30 metros halin sa baybayon sang Barangay Sabang, Baler, Aurora.
Gilayon nga nagpatigayon sang rescue operation ang mga katapo sang Coast Guard Station Aurora, upod ang Baywatch team, matapos nila makita nga nagakinahanglan sang bulig ang mga turista.
Suno sa PCG, luwas nga nadala pabalik sa baybayon ang lima ka turista kag ginkumpirmar nga wala sila sing pilas ukon injury.
Wala man sila nagkinahanglan nga dal-on sa ospital ukon hatagan pa sang dugang nga pag-atipan medikal.
Ginpaandaman naman liwat sang Coast Guard ang publiko nga sundon ang mga pahibalo para sa kaluwasan sa mga baybayon, maghalong kun nagalangoy, kag likawan ang paglusong sa dagat kun makit-an nga delikado ang kahimtangan sini.
“Through its swift and coordinated response, the PCG reaffirms its commitment to protecting lives at sea and ensuring the safety of beachgoers and coastal communities,” suno sa PCG.
