Nagpanindugan ang Philippine National Police ukon PNP nga indi nila pagbuy-an ang ila obligasyon agud maaresto si Senador Ronald “Bato” dela Rosa.
Ini matapos mag-expire subong nga Oktubre 30 ang isa ka semana nga ultimatum sa pag-surrender sang pugante nga senador.
Suno kay PNP Deputy Chief for Administration Lieutenant General Wilson Joseph Lopez, ginapabaskog sang kapulisan ang ila nga intelligence monitoring sa pagpangita sa senador, paagi man sa ila gintukod nga tracker team kag task group sa nagkalain-lain nga rehiyon.
Sa matandaan nga nagtanyag ang Department of the Interior and Local Government sang 50 million pesos sa kun sin-o man ang makahatag sang impormasyon ukon makatudlo sa ginahamtangan ni Sen. Bato.
Nahibaluan nga nagapangatubang ang senador sang arrest warrant halin sa International Criminal Court kaangot sang kaso nga crimes against humanity nga may kaangtanan sa kampanya kontra illegal nga droga sadtong administrasyon ni anay President Rodrigo Duterte.
Sa pihak sini, ginpasiguro sang ahensya nga bukas sa gihapon ang ila nga talatapan sa boluntaryo nga pag-surrender sang senador kag ginpasiguro ang iya nga seguridad.
