Ginakabig sang director sang Jaro Archdiocesan Social Action Center (JASAC) nga ang pagpatigayon sang ossuary amo ang pinakamaayo nga solusyon agud nga masabat ang pagginutok sang mga patyo diri sa syudad sang Iloilo.
Ang ossuary kaangay sang makit-an sa Jaro Cathedral amo ang ginakabig sagrado nga suludlan, kahon, ukon estruktura kun sa diin mahimo mabutang ang tul-an sang mga minatay.
Sa interview sang Bombo Radyo kay Msgr. Meliton Oso, iya ginpahayag nga kun lantawon ang economic kag religious aspect, makit-an nga kinahanglanon na ang ossuaries agud ma-address ang problema.
Sa economic aspect suno kay Msgr. Oso, tuman ka mahal sang duta, okupado, limitado ang espasyado, kag kinahanglan man sang iban nga mga pumuluyo.
Nagalab-ot na sa lima ka andana ang tangkas sang nitso sa mga patyo suno kay Msgr. Oso, gani nga delikado na kun dugangan pa gid bangud nga posible nga indi na masarangan sang pundasyon kag mahimo marumpag.
Pahayag sini, kun makuha ang tul-an sa pantyon kag masaylo sa ossuary, mahimo naman nga magamit sang iban ang nitso.
Sa pihak nga bahin, sa religious aspect naman suno kay Msgr. Oso, mas mahapos para sa mga tawo nga magbisita sa ila nga mga minatay kun yara sa ossuary sa Simbahan pagkatapos nila sa pagsimba.
“Mas malapit sa mga tumuluo, kay pagsimba mo, mahapit ka na lang dayon, indi ka na magkadto sa sementeryo,” suno kay Msgr. Oso. Ginhalimbawa sini ang mga sumilimba sa Jaro Metropolitan Cathedral nga nagabisita sa ila nga mga minatay sa ossuary pagkatapos sang misa kun Domingo, ukon sa daily basis.
Nahibaluan nga naghimo sang lihok ang Iloilo City Government para sa mas masangkad nga cemetery modernization program paagi sa pag-exhume sang pagsaylo sang ginatos ka mga bangkay sa Tanza Public Cemetery sa first phase sang rehabilitation project.
Ini nga proyekto naga-cover sang demolition sang daan kag guba na mga pantyon kag pagtukod sang 200 apartment-type burial niches.
Ginaplano man ang kaangay nga rehabilitasyon sa Jaro kag La Paz public cemeteries.
Subong nga Pista Minatay, temporaryo anay ini nga gin-untat agud hatagan sang ligwa ang mga pumuluyo nga nagabisita sa ila mga nagtaliwan nga mga himata.#
