Indi magdayon sa pagpungko ang Catholic priest nga gin-appoint ni Pope Leo XIV bilang bishop sang Tagbilaran sa Bohol.
Sa official statement ni Fr. Gerardo Saco Jr. subong nga aga, Mayo 5, ginsiling sini nga nagapangayo siya sang paghangop bangud sang “change of heart” kasunod sang iya mga limitasyon kag kakulangan.
“It comes from a deep awareness of my own human limitations and inadequacies,” suno kay Saco.
Ini nga desisyon ang gin-anunsyo masobra isa ka bulan matapos nga gin-appoint siya sang Santo Papa nga pangunahan ang Tagbilaran Diocese.
Wala sang obispo ang amo nga diocese halin sang ginsaylo si Archbishop Alberto Uy sa Cebu sang September 2025.
Nahibaluan nga nagaserbe si Saco bilang diocesan administrator sa tion nga ginpatigayon ang appointment kag naka-schedule kuntani ang episcopal ordination kag installation sa Mayo 26.
Ang 61-anyos nga si Saco ang tumandok gid sang Tagbilaran City kag na-ordenahan bilang pari sadtong Abril 26, 1993.
Halos tatlo ka dekada siya sa ministry kun sa diin nakauyat ini sang nanuhay-tuhay nga pastoral and leadership roles sa diocese.
Nakapangalagad siya bilang vicar general sa idalom ni Uy kag nakauyat man sang assignments bilang parochial vicar, parish priest, kag missionary sa Libya, amo man bilang visiting priest sa New York.
Sang 2015 tubtub 2021, nag-alagad siya bilang Episcopal Vicar for the Laity, kag sang ulihi nangin vicar forane antes nagpungko bilang diocesan administrator.
Nagaserbe man siya nga chairperson sang diocesan Commission on Social Action kag priest-in-charge sang St. Vincent Ferrer Mission Station sa Barangay Cabawan, Tagbilaran City.
“Please be assured of my continued commitment as a priest, to journey with you in faith in the Risen Lord, who never abandons us in moments of trial and need,” pahayag sini sa statement nga gin-post sang Roman Catholic Diocese of Tagbilaran.
