Ginapahanumdom sang simbahan nga ang matuod nga kabalaka kag pagkamabinuligon ang nagasugod sa tagipusuon.
Sa homily ni Rev. Fr. Julius Almeria sa misa sa Jaro Metropolitan Cathedral kun sa diin iya ginbasa ang Ebanghelyo tuhoy sa milagro sang lima ka tinapay kag duwa ka isda, ginsiling niya nga kun wala sang tagipusuon, wala sang sinseridad ang pagbulig.
Suno sa iya, wala ginatakos sang Diyos ang balor sang kun ano ang ginahatag kundi ang katampad kag pagpalangga nga ginaupod sa butang nga ginahatag.
Ginpaathag niya nga wala ginapangayo sang Diyos ang mga bagay nga wala ang tawo.
Sa baylo, gina-engganyo niya ang kada isa nga maghatag sang masarangan bisan ano man ini.
Sa iya pagtalakay sa milagro sang lima ka tinapay kag duwa ka isda, ginsiling ni Fr. Almeria nga nangin bastante ang gamay nga balon sang isa ka bata nga lalaki bangud ginhatag niya ini sang hugot sa tagipusuon kag linibo ang nabusog.
Dugang pa niya, ang kada gamay nga butang nga maayo ang mahimo magbunga sang mas dako nga grasya kun ginahimo nga may pagtuo kag pagpalangga.
Gin-engganyo sini ang mga tumuluo nga indi magduha-duha sa paghatag bangud sa kamot sang Diyos, anga gamay nga butang, mahimo mangin dako nga bugay sa kadam-an.
