Naghingyo ang defense team ni former President Rodrigo Duterte sa International Criminal Court (ICC) Trial Chamber III nga tugutan sila nga makahambal sa opening statement kaangot sa karakter kag kondisyon sang akusado.
Lakip ini sa ginpahayag ni lead Defense counsel Peter Haynes sa ika-lima kag katapusan nga status conference antes magsugod ang trial sa kaso ni Duterte nga crimes against humanity sa Nobyembre 30.
Sa hearing kahapon, na-istoryahan ang opening statements sang prosecution amo man sang Common Legal Representatives of the Victims ukon ang mga abogado sang mga biktima.
Ginpahayag ni Presiding Judge Joanna Korner kun luyag bala sang defense nga maghatag sang outline sa korte kag sa publiko kun ano ang mangin depensa ni Duterte.
“And I want to know if you’ve considered applying, not to open in full, but to give, if you like, the public and the court an outline of what your defense is going to be, along the lines of what happens in other jurisdictions?” pahayag sang judge.
Sabat naman ni Haynes, maga-file sila sang posisyon sa masunod nga mga inadlaw, apang pahayag sini, daku ang posibilidad nga may ihambal siya sa imbukada sang trial natuhoy sa karakter sang akusado kag ang iya subong nga status.
“We will certainly finalize that position within the next few days, and we’ll let you know for scheduling purposes. But I think it’s more likely than not that I will say something at the start of the case, given its stature, really, and the character of the accused and his status,” dugang ni Haynes.
Suno naman kay Atty. Kaiser Cordero, Founder and Chief Executive Officer sang Cordero and Associates nga isa sa mga personal nga nagtambong sa 5th Status Conference sa ICC sa The Hague, balantayan pa sa Nobyembre 30 kun i-grant sang court ang amo nga request.
Ginpahayag man ni Atty. Cordero nga nalakip sa hingyo ni Haynes amo nga hatagan sila sang kinamatarong nga makahambal sang una sangsa prosecution apisar nga sa ICC Rules on Procedure and Evidence, ang prosecution ang una nga maga-address sa court kun opening statement ang pagahambalan.
Ang hearing kahapon amo ang katapusan nga status conference para sa mga partido antes magsugod ang trial sa Nobyembre 30. Gin-waive ni Duterte ang iya kinamatarong nga magtambong sa amo nga hearing matapos nga nagpakita sa third and fourth status conferences.
Ang status conference amo ang lugar kag tyempo kun sa diin may diskusyon ang mga kampo kaangot sa kaso antes magpadayon sa full trial. Ini agud masiguro nga mangin matalunsay na ang schedule kag iban pa nga legal matters antes ang actual trial days.
