Ginbulsa sang Pinay tennis star nga si Alex Eala ang gold medal sa women’s singles sa 33rd Southeast Asian Games matapos ginlutos ang tiglawas sang Thailand nga si Mananchaya Sawangkaew sa final match subong nga adlaw.
Ginpierde ni Eala ang home bet sa straight-sets, 6-1, 6-2, sa National Tennis Development Center sa Nonthaburi, Thailand pasado 12:00 subong nga udto (Philippine time.)
Maragtason ini nga kadalag-an para sa Pilipinas matapos ulihi nga nadag-an ang bulawan nga medalya sa women’s singles sa biennial meet paagi kay Maricris Fernandez-Gentz sang 1999. Sang amo nga tuig, wala pa nabun-ag ang subong world no. 52 nga si Eala.
Ini ang una nga gold medal ni Eala sa SEA Games kag iya ikatatlo nga medalya sini nga edisyon matapos nakadaog man sang bronze sa women’s team event kag sa mixed doubles.
Sang 2021 nga edisyon sang tournament, bronze medalist si Eala sa women’s singles event.
Siya kag ang volleyball player nga si Bryan Bagunas ang flagbearers sang Pilipinas sa Bangkok subong nga 2025.
