Apektado sang nanuhay-tuhay nga weather systems ang madamo nga parte sang Pilipinas subong nga adlaw, Enero 2, nga nagdala sang mga pag-ulan-ulan kag mga pagbaha.
Suno sa Philippine Atmospheric, Geophysical and Astronomical Services Administration (PAGASA), may pag-ulan-ulan kag pagpanaguob sa Western Visayas amo man sa Albay, Sorsogon, Masbate, Romblon, Palawan, kag Northern Samar bangud sa shear line.
Nagpaandam man ang state weather bureau sang posible nga flash floods ukon pagkatiphag sang duta ilabi na sa manubo nga areas kag sa nabukid man nga mga porsyon bangud sang kasarangan tubtub mamunog nga ulan.
Sa syudad kag probinsya sang Iloilo, nag-umpisa ang mabaskog nga bubo sang ulan pasado alas tres subong nga hapon.
Sa iban nga areas sa pungsod, nagaapekto ang easterlies amo man ang northeast monsoon ukon ang amihan.
Ginklaro sang weather bureau nga wala ini sang na-monitor nga low-pressure area ukon tropical cyclone sa guwa kag sulod sang Philippine area of responsibility (PAR) as of posting time.
